ليه جالى احساس بالاكتئاب فجاة؟؟لا مش فجاة و لاحاجة هو كان موجود بس مستخبي فى الاعماق الداخليه طيب اللى طلعه دلوقتى بس ايه اللى حصل ؟؟؟ مش فاكرة ان حاجة حصلت ايه يا بنت ايه يا بنت مش فاكرةحاجة كل اللى انا فاكراه ان انا كنت راكبة تاكسي و مرة واحده حسيت انى مخنوقة و عايزة اعيط يمكن من ريحة السجاير اللى كان السواق مالى بيها العربية اكيد لا لانى متعوده على الريحة دى و بصراحة لما بدخل تاكسي و مش بشم ريحة سجاير بقلق بحس ان فى حاجة مش مظبوطة .
لسه معرفتش انا اكتئبت ليه مرة واحده ؟؟؟و مش بس اكتئبت ده انا حسيت احساس غريب حسيت ان حياتى كلها مرت قدام عيني كانها...... لا مش شريط سينما ياريييتتت ده انا حسيت ان انا عاملة زى البتاعة دى اللى الملاكمين بيتدربوا عليها عارفينها؟؟؟مش فاكرة اسمها ايه و حياتى مش بس بتمر قدام عينى لا دي حياتى هى الملاكم اللي بيضرب فى البتاعة دى(نفسي اعرف اسمها) و قعدت افتكر فى حاجات كئيبة و مواقف حزينة حصلتلى و ناس سخيفة مروا عليا فى مختلف مراحلى العمرية(و ما اكثرهم) و الاكتئاب تحول لاحساس فظيع ان انا فاشلة اه انا فاشلة و مقدرش انكر ده,, لا مش فاشلة اه صحيح انا فى شخصيتى جوانب فاشلة لكن مينفش التعميم و اقول على نفسي فاشلة مانا ياما نجحت فى حاجات كتير و فجاة ابتدي جوايا صراع داخلى و حوار عقيم عارفة بدايته بس و لامرة حاولت الاقيله نهاية .
و الحوار ده كان عباره عن نفسي بتكلم نفسي اه متستغربوش ماهو كل واحد فينا عنده نفسين واحده بتطبطب و واحدة بتبهدلك و بتشتمك و ساعات كمان بتديلك بالقفاه لو لزم الامر و احيانا بتلومك باسلوب كله تشفى عارفين دول عاملين كده زي الام و الاب ,الام فى معظم الحالات بتطبطب و تدلع و الاب بيغسلك لما تعمل حاجة غلط دول بالظبط زى ال 2 نفسي اللى عندي المهم ال 2 بداوا الحوار و للامانه نفسي الطيبة متكلمتش غير 3 او 4 كلمات و التانية قامت بالواجب و مبطلتش رغى الحوار كان بيقول:
نفسي الطيبة: متقوليش على نفسك فاشلة مش معنى انك فشلتى فى شغلك يبقى انتى فاشله فى حاجات تانيه انتى مش فاشلة فيها بالعكس ناجحة جدا.
نفسي الرذله:و الله!!!زي ايه طيب الحاجات اللى انا(ناجحة فيها)؟؟؟
نفسي الطيبة بعد طول تفكير:زى زى زى العلاقات الشخصية و الحياة العا ,العاط,العاطفية.
نفسي الرذله:ههههههههههههههههه(ضحكة شريرة ساخرة)عاطفية مين و الناس نايمين ده انتى اكبر فاشله فى الحاجات دي اساليني انا
و هنا توقفت نفسي الطيبة عن الكلام و بدات الرذله فى رمى الالغام.
سيبتى شغلك لانك فاشلة و مقدرتيش تتحملى الضغوط و النفسنة و تدخل كل من هب و دب فى حياتك و ناس كتير اقل كفاءة منك يا عبيطة(ده نفسي الرذلة بتقولى) وصلوا لمراكز اعلي منك و خدوا مكانك اللى كان المفروض يكون مكانك و بالنسبة بقى لحياتى العاطفيه يييييييييياه مقولكوش ياما دقت على الراس طبول لا الحقيقة مش طبول بس ده طبول و رق و صاجات كمان !
قابلت ناس غلط فى اوقات صح و ناس صح فى اوقات غلط و ناس مش ناس (الحقيقة لسه مش عارفة اقدر اصنفهم تحت اي خانه) و ارتبطت بناس عن عدم اقتناع و ناس اقتنعت بيهم و مرة واحده لقتنى بقول مين دول؟؟؟؟ انا زى قولت اه و ناس ارتبطت بيهم على سبيل المجاملة اه و الله عارفين انتوا لما حد يعزم عليك بسندويتش و انت مش جعان او نفسك تاكل بيتزا مش سندويتش بس مقدرتش تقول لا لانك بصيت فى عين الشخص اللي بيعزم عليك و فكرت انك لو قولت لا حتزعله بس مش مهم انت بقى يجيلك تلبك معوى و لا مغص و لا متقدرش تكمل بقية السندويتش المهم الاستاذ اللى عزمك ده مينجرحش فى مشاعيروه.
و بيقولك السعيد فى الحب تعيس فى اللعب انا بلا فخر تعيسة فى الاتنين على اساس ان الشغل ده هو اللعب يعنى فى الحياة الرائعة اللى احنا عايشين فيها,
اذا" انا فا شلة لا ده انا مش بس فاشلة ده انا فاشلة فشل ذريع
و هنا صحيت نفسي الطيبة من النوم و قالت كلام(مش مقنع خالص)و هى يا عينى بتحاول تلم بقية اشلائى:
كل واحد بيبقى عنده حاجة مميز فى ,,,اي حاجة,, مش معقول فى حد فاشل 100% اكيد فى حاجةمميزه فيكى..
حاجة مميزة فيا انا؟؟؟؟؟صح عندك حق يا نفسي يا طيبة يا مقطقطة انتى,انا بموت فيكى يا رافعة من روحى المعنويه,يا اطيب نفس فى الدنيا,يا...,بس ياتري ايه الحاجة دي ؟يعنى انا مميزه فى ايه ؟طريقة كلامى؟لا معتقدش محدش غلط مرة و قالى كده؟يمكن انا مثلا شاطرة فى شغل البيت؟؟حنشتغل بعض؟عادى يعنى ما كل البنات شاطرين فى الحاجات دى او على الاقل ممكن يتعلموا طيبببببببببببببب انا شاطرة فى ايه؟؟؟؟؟؟؟؟؟؟؟؟؟انا مميزة فى ايه؟؟؟؟؟؟؟؟؟؟؟؟؟ياريتك يا نفسي يا طيبة ماتكلمتى ده انا مطلعتش فاشلة و بس ده فى مصيبة اكبر كمان ان انا بفرض ان عندي حاجة مميزةكمان مش عارفة ايه الحاجة دى ,,,ايه ده؟؟ ده انا كمان ممكن اموت قبل مكتشف ايه الحاجة دي ؟ياتري ايه الحاجة دي و ياتري لو عرفتها كان فى حاجةفى حياتى حتتغير؟؟؟ و ياتري و ياتري ؟؟؟؟؟؟؟؟؟؟؟؟؟؟؟؟
انا فاشلة!!!!!!!
و هنا خلاص نفسي و نفسي سكتوا مش علشان الحوار خلص لا علشان الحوار مالوش نهايه و كمان فى صوت تالت طلع مرة واحدة و قاللى حتنزلى هنا و لا فين يا انسه؟....
[u]

الف شكر على الموضوع المميز

بأنتظار المزيد

وفى تقدم مستمر

بالتوفيق